హైదరాబాద్ : ఒలింపిక్స్ మహిళల బ్యాడ్మింటన్‌లో రజత పతకం సాధించి మువ్వన్నెల పతాకాన్ని వినువీధిలో సగర్వంగా ఎగరేసిన పీవీ సింధు, ఆమె కోచ్ గోపీచంద్‌లకు శంషాబాద్ లోని రాజీవ్‌గాంధీ అంతర్జాతీయ విమానాశ్రయంలో ఘన స్వాగతం లభించింది. ఉదయం 9 గంటల సమయంలో విమానాశ్రయంలో దిగిన పీవీ సింధుకు స్వాగతం పలికేందుకు ముందుగానే ఆమె తల్లిదండ్రులు పీవీ రమణ, విజయలతో పాటు తెలంగాణ క్రీడా శాఖ మంత్రి తలసాని శ్రీనివాస యాదవ్, ఉప ముఖ్యమంత్రి మహమూద్ అలీ, నాయిని నరసింహారెడ్డి, వి.హనుమంతరావు, మేయర్ బొంతు రామ్మోహన్, ఏపీ హోం మంత్రి నిమ్మకాయల చినరాజప్ప, మరో మంత్రి దేవినేని ఉమామహేశ్వరరావు, ఎంపీ కేశినేని నాని, జీహెచ్ఎంసీ కమిషనర్ జనార్దన్ రెడ్డి, ఇంకా పలువురు క్రీడా, అధికార, అనధికార ప్రముఖులు శంషాబాద్ చేరుకున్నారు.
ముంబై నుంచి ప్రత్యేకంగా తెప్పించిన డబుల్ డెక్కర్ ఓపెన్ టాప్ బస్సును పూలదండలతో అలంకరించారు. బస్సు మొత్తాన్ని చివరి నిమిషంలో కూడా పోలీసు శునకాలతోను, మెటల్ డిటెక్టర్లతోను క్షుణ్ణంగా తనిఖీ చేయించారు. గోపీచంద్ అకాడమీ నుంచి వచ్చిన పలువురు విద్యార్థులు కూడా తమ తోటి క్రీడాకారిణి సింధును సాదరంగా స్వాగతించారు. విమానాశ్రయం నుంచి బయటకు వచ్చిన వెంటనే ఆమె ప్రముఖుల నుంచి బొకేలు అందుకుని.. తన కోసం సిద్ధంగా ఉన్న ఓపెన్ టాప్ బస్సు ఎక్కింది. చాలామంది ఆమెకు స్వయంగా పూల బొకేలు, దండలు చేతికి ఇవ్వలేకపోవడంతో.. ఓపెన్ టాప్ బస్సు ఎక్కిన తర్వాత కూడా కింది నుంచి పైకి వాటిని విసిరారు. వాటిని ఆమె అందిపుచ్చుకుని, అక్కడి నుంచే వారికి అభివాదాలు తెలిపారు.
సింధుకు స్వాగతం ప‌లికిన మంత్రులు
రియో ఒలింపిక్స్‌లో సిల్వర్ మెడల్ సాధించిన బ్యాడ్మింటన్ స్టార్ పి.వి.సింధు శంషాబాద్ విమానాశ్రయానికి చేరకున్నారు. డిప్యూటీ సీఎం మహమూద్ అలీ, మంత్రులు నాయిని న‌ర్సింహారెడ్డి, తలసాని శ్రీనివాస యాదవ్ ఆమెకు ఘనస్వాగతం ప‌లికారు. స్థానిక ఎమ్మెల్యే ప్రకాశ్‌గౌడ్‌తో పాటు పలువురు ఉన్నతాధికారులు కూడా ఆమెను సాదరంగా ఆహ్వానించారు. ఇక ఆంధ్రప్రదేశ్ మంత్రులు చినరాజప్ప, దేవినేని ఉమామహేశ్వరరావు, శాప్‌ ఛైర్మన్‌ మోహన్‌, విజయవాడ ఎంపీ కేశినేని నాని, ప్రముఖులు సింధుకు స్వాగతం ప‌లికారు. పి.వి సింధు విమానాశ్రయం నుంచి గచ్చిబౌలి స్టేడియానికి చేరుకునేందుకు అధికారులు భారీ ఏర్పాట్లు చేశారు.
