ఏపీలో రెండోరోజు కొనసాగిన..  ఐటీ సోదాలు.. 

– ‘పేరం’గ్రూపు అధినేత హరిబాబు ఇళ్లు, కార్యాలయాల్లో సోదాలు
– తొమ్మిది బృందాలతో సోదాలు
అమరావతి, అక్టోబర్‌30(జ‌నంసాక్షి) : ఆంధప్రదేశ్‌లో ఆదాయపు పన్ను అధికారుల సోదాలు రెండో రోజూ మంగళవారం కొనసాగాయి. గుంటూరుకు చెందిన ప్రముఖ వ్యాపారవేత్త, టీడీపీ నేత కోవెలమూడి రవీంద్ర నివాసం, కార్యాలయాల్లో ఐటీ అధికారులు సోమవారం దాడులు నిర్వహించిన విషయం తెలిసిందే. మంగళవారం మరో టీడీపీ నేత బంధువు ఇళ్లు, కార్యాలయాల్లో ఐటీ సోదాలు నిర్వహిస్తున్నారు. విశాఖ కేంద్రంగా కార్యకలాపాలు సాగిస్తోన్న ‘పేరం’ గ్రూపు అధినేత హరిబాబుకు చెందిన ఇళ్లతో పాటు హైదరాబాద్‌, తిరుపతి, విశాఖపట్నం ప్రాంతాల్లో ఉన్న ఆయన కార్యాలయాల్లో తనిఖీలు సాగుతున్నాయి. మంగళవారం ఉదయమే విశాఖతో పాటు మిగతా చోట్ల ఏకకాలంలో తొమ్మిది ప్రత్యేక బృందాల ఆధ్వర్యంలో తనిఖీలు చేపట్టారు. రెండు వారాల కిందటే ఇక్కడ సోదాలు నిర్వహించిన ఐటీ అధికారులు మరోసారి తనిఖీలకు ఉపక్రమించారు. వ్యవసాయ భూములు ప్లాట్లుగా మార్చి విక్రయించిన నేపథ్యంలో వాటికి జీఎస్టీ చెల్లించలేదని గుర్తించడంతో ఐటీ దాడులు చేపట్టినట్లు సమాచారం. పేరం గ్రూపు అధినేత హరిబాబు టీడీపీ ఎమ్మెల్యే యరపతినేని శ్రీనివాస్‌కు బంధువు కావడం గమనార్హం. రాజకీయ కక్ష సాధింపులో భాగంగానే ఆయన సంస్థ, ఇళ్లలో ఐటీ దాడులకు పాల్పడుతున్నారా? అనే ప్రచారం సాగుతోంది. గతవారం కూడా విశాఖ పరిసర ప్రాంతాల్లోని పలు సంస్థల్లో ఐటీ సోదాలు నిర్వహించారు. టీడీపీ నేతలు, వారి బంధువుల ఇళ్లు, సంస్థలే లక్ష్యంగా ఐటీ సోదాలు నిర్వహించడంతో రాజకీయంగా చర్చ జరుగుతోంది.