సూర్యాపేట ప్రతినిధి ( జనంసాక్షి ): జిల్లా కేంద్రంలోని అన్నపూర్ణ సహిత విశ్వనాథ స్వామి వారి దేవాలయంలో పవిత్రమైన కార్తీక మాసంను పురస్కరించుకుని ప్రతిరోజు ఉదయం నుండి మధ్యాహ్నం వరకు స్వామి వారికి అభిషేకం, అష్టోత్తర హారతి,ప్రత్యేక పూజలు నిర్వహిస్తున్నట్లు ఆ దేవాలయ కార్యనిర్వాహక అధికారి ఎంపీ లక్ష్మణరావు , ప్రధాన అర్చకులు వలివేటి వీరభధ్ర శర్మ తెలిపారు.కార్తీక మాసపు రెండో సోమవారం సందర్భంగా భక్తులు స్వామివారిని దర్శించుకుని ప్రత్యేక పూజలు నిర్వహించారు.ఈ సందర్భంగా దేవాలయ ప్రధాన అర్చకులు వలివేటి వీరభధ్ర శర్మ మాట్లాడుతూ అతి పురాతనమైన , మహిమాన్వితమైన‌ శివాలయ దర్శనంతో భక్త కోటికి సర్వం శుభం కలుగుతుందని,మహాశివుని ఆశీస్సులు పొందవచ్చని అన్నారు.ప్రత్యేక అభిషేకాల అనంతరం స్వామి వారిని పూలమాలలతో అలంకరణ చేశారు.ఈ కార్యక్రమంలో ఆలయ సహాయ అర్చకులు సాగర శర్మ , భక్తులు తదితరులు పాల్గొన్నారు.