మంటల్లో స్కూల్‌ బస్సు..
టీచర్‌ అప్రమత్తతతో చిన్నారులు క్షేమం
రామచంద్రపురం, జూన్‌15(జ‌నం సాక్షి ) : తూర్పుగోదావరి జిల్లాలో పెనుప్రమాదం తప్పింది. స్కూల్‌ బస్సులో మంటలు చెలరిగాయి.. దీంతో టీచర్‌ అప్రమత్తతతో స్కూలు పిల్లలు పెను ప్రమాదం నుంచి సురక్షితంగా బయటపడ్డారు. వివరాల్లోకి వెళితే.. రామచంద్రపురం మండలం ద్రాక్షరామ అన్నయ్యపేటలో ఓ ప్రైవేటు పాఠశాలకు చెందిన బస్సు చిన్నారులను తీసుకుని వస్తుండగా బీమాక్రోసూపాలేం గ్రామంలో రోడ్డు ప్రక్కనే ఉన్న ట్రాన్స్‌ఫార్మర్‌ను ఢీకొట్టింది. వెంటనే షాక్‌తో బస్సులో మంటలు చెలరేగాయి. ప్రమాద సమయంలో బస్సులో 15మంది చిన్నారులతో పాటు రాజేశ్వరి అనే టీచర్‌ ఉన్నారు. ప్రమాదాన్ని గుర్తించిన టీచర్‌ ఎంతో సమయస్ఫూర్తితో చిన్నారులను బస్సులో నుంచి హుటాహుటిన కిందికి దించి వారి ప్రాణాలను కాపాడింది. అనంతరం బస్సు పూర్తిగా దగ్ధమైంది. ప్రమాదం నుంచి చిన్నారులంతా సురక్షితంగా బయటపడంతో అంతా ఊపిరి పీల్చుకున్నారు.