ఈ నేపథ్యంలో తాజాగా రతన్‌ టాటాకు చెందిన పాత వీడియో ఒకటి సామాజిక మాధ్యమాల్లో వైరల్‌గా మారింది. 2013లో కొలంబియా బిజినెస్‌ స్కూల్‌లో ఓ కార్యక్రమంలో గౌరవ అతిథిగా పాల్గొన్న ఆయన, టాటా సన్స్‌ ఛైర్మన్‌గా బాధ్యతలు చేపట్టిన తొలి నాళ్లలో తనకు ఎదురైన అనుభవాన్ని వివరించారు. ఓ గ్యాంగ్‌స్టర్‌ తనను చంపేందుకు ఒప్పందం చేసుకున్నప్పటికీ ఎలాంటి ఒత్తిడికి గురి కాకుండా తన పని తాను చేసుకుంటూ వెళ్లినట్లు చెప్పారు. ఆ సమయంలో అతనితో రాజీ పడాలని చాలా మంది తనకు సూచించినా.. ఆ పని చేయలేదని చెప్పారు.

”టాటా గ్రూప్‌ ఛైర్మన్‌గా బాధ్యతలు చేపట్టిన 15 రోజులకు నేను ఈ సమస్యను ఎదుర్కొన్నాను. మా సంస్థల్లో ఒకటైన టాటా మోటార్స్‌లో పెద్ద మొత్తంలో సంపద ఉందని భావించిన ఓ గ్యాంగ్‌స్టర్‌, ఎలాగైనా దాన్ని తన నియంత్రణలోకి తెచ్చుకోవాలనుకున్నాడు. మా సంస్థలో అతడికి 200 మంది అనుచరులు ఉన్నారు. వారితో కంపెనీ కార్యకలాపాలు అడ్డుకోవాలనుకున్నాడు. కానీ, నేను మాత్రం అతడి ఒత్తిడికి తలొగ్గకుండా.. అతడిని ఎదుర్కొవాలని నిర్ణయించుకున్నాను. నాతో ఉన్నవారు, సంస్థలోని ఉద్యోగులు మాత్రం గ్యాంగ్‌స్టర్‌కు పోలీసుల మద్దతు కూడా ఉండటంతో అతడితో రాజీ పడటం మంచిదని భావించారు. మేం ఊహించినట్లుగానే అతడు మా ప్లాంట్‌ కార్యకలాపాలను అడ్డుకున్నాడు. తన అనుచరులతో సమ్మెకు పిలుపునిచ్చాడు” అని రతన్‌ టాటా తెలిపారు.

సమ్మె పిలుపుతో కొద్ది మంది ఉద్యోగులు మాత్రమే విధులకు హాజరయ్యేవారని, వారికి అండగా ఉంటానని భరోసానిచ్చేందుకు తాను కూడా రోజంతా ప్లాంట్‌లోనే ఉండేవాడినని రతన్‌ టాటా వివరించారు. దీంతో మిగిలిన ఉద్యోగులు సైతం ప్లాంట్‌కు వచ్చి పనిచేయడం ప్రారంభించారని ఆయన చెప్పారు. అయితే, గ్యాంగ్‌స్టర్‌ మాత్రం ప్లాంట్‌ మూతపడిందని ప్రచారం చేయడంతో, దాన్ని తిప్పికొట్టేందుకు ప్లాంట్ పనిచేస్తుందని, ఉద్యోగులు తిరిగి విధులకు హాజరయ్యారని తెలిసేలా కొన్ని ప్రకటనలు చేయించినట్లు తెలిపారు.

యాజమాన్యం వెనక్కి తగ్గడం లేదని గ్రహించి, మిగిలిన ఉద్యోగులు కూడా సమ్మెను విరమించడంతో గ్యాంగ్‌స్టర్‌ పథకం బెడిసికొట్టిందని రతన్‌ టాటా చెప్పారు. తర్వాత, గ్యాంగ్‌స్టర్‌ను పోలీసులు అరెస్టు చేశారని, అతడు జైలు నుంచి విడుదలయ్యాక తనను హత్య చేయించేందుకు ఒప్పందం చేసుకున్నాడని తెలిసి, చాలా మంది అతడితో రాజీ పడాలని సూచించారు. కానీ, తాను మాత్రం ఆ ఒత్తిడికి తలొగ్గకుండా తన పని చేసుకుంటూ వెళ్లిపోయానని రతన్‌ టాటా వీడియోలో వివరించారు.