13 ఏళ్లలోపు పిల్లలు సోషల్‌మీడియాను వినియోగించకుండా చట్టబద్ధమైన నిషేధం విధించాలని కోరుతూ దాఖలైన పిటిషన్‌ను సుప్రీం కోర్టు (Supreme Court) తిరస్కరించింది. ఈమేరకు శుక్రవారం అత్యున్నత న్యాయస్థానం తన నిర్ణయం వెలువరించింది. ‘‘ఇది పాలసీకి సంబంధించిన విషయం. దీనిపై  ప్రస్తుతం దాఖలు చేసిన పిటిషన్‌ను స్వీకరించలేము. దీనికి పరిష్కారం విధానపరమైన నిర్ణయం పరిధిలో ఉంది’’ అని జస్టిస్‌ బీఆర్‌ గవాయ్‌, జస్టిస్‌ అగస్టిన్‌ జార్జ్‌ మసిహ్‌తో కూడిన ధర్మాసనం వ్యాఖ్యానించింది.

పిటిషనర్లు సంబంధిత విభాగానికి వినతి చేసేందుకు అవకాశాన్నిస్తూ ఆ పిటిషన్‌ను కొట్టివేసింది. ఒకవేళ ఇప్పటికే సంబంధిత విభాగానికి అర్జీ పెట్టుకొని ఉంటే.. వారు దానిని 8 వారాల్లో పరిష్కరించాలని న్యాయస్థానం పేర్కొంది.

ఈ పిటిషన్‌ను జెప్‌ ఫౌండేషన్‌ దాఖలు చేసింది. సోషల్‌ మీడియాలో బలమైన వెరిఫికేషన్‌ వ్యవస్థను ఏర్పాటుచేసేలా కేంద్రం, ఇతరులకు మార్గదర్శకాలు ఇవ్వాలని అందులో కోరింది. దీంతోపాటు చిన్నారులకు సోషల్‌ మీడియాలో యాక్సెస్‌ను నియంత్రించాలని కోరింది. పిటిషనర్ల తరఫున న్యాయవాది మోహిని ప్రియా వాదించారు. పిల్లల భద్రత కోసం ఏర్పాటుచేసిన నిబంధనలను ఉల్లంఘించిన సోషల్‌ మీడియా సంస్థలకు భారీగా జరిమానాలు విధించాలని పిటిషనర్లు న్యాయస్థానాన్ని కోరారు.