– తన ఫిర్యాదుకు న్యాయం జరగలేదని ఆవేదన
– అదే సమయంలో పరీక్షల్లో ఫెయిల్‌ కావడంతో మానసికంగా కృంగిపోయిన శిల్ప
– పడకగదిలో నైలాన్‌తాడుతో ఉరేసుకొని ఆత్మహత్య
చిత్తూరు,ఆగస్టు7(జ‌నంసాక్షి): చిత్తూరు జిల్లా పీలేరులో జూనియర్‌ డాక్టర్‌ ఆత్మహత్య కలకలంరేపింది. పట్టణంలోని జాగృతి అపార్టుమెంటులో ఉంటున్న శిల్ప(30) ఇంట్లో ఎవరూ లేని సమయంలో మంగళవారం ఉరి వేసుకొని ప్రాణాలు తీసుకుంది. పీలేరు మండలం బాలంవారిపల్లె కు చెందిన శిల్ప తిరుపతిలోని ఎస్వీ మెడికల్‌ కాలేజీలో పీడియాట్రిక్‌ డిపార్ట్‌మెంట్‌లో పీజీ చదువుతోంది. ఐదేళ్ల క్రిత ఆమె రూపేష్‌కుమార్‌ రెడ్డిని ప్రేమ వివాహం చేసుకొంది. అతడు పీలేరులో ఎముకల డాక్టర్‌గా పనిచేస్తున్నాడు. ఆత్మహత్య గురించి సమాచారం అందుకున్న పోలీసులు శిల్ప మృతదేహాన్ని పోస్ట్‌మార్టమ్‌కు తరలించారు. శిల్ప కొద్దిరోజుల క్రితం ప్రొఫెసర్లు తనను వేధిస్తున్నారంటూ ఉన్నతాధికారులకు ఫిర్యాదు చేసింది. వారు పట్టించుకోలేదంటూ నేరుగా గవర్నర్‌ నరసింహన్‌కు మెయిల్‌ ద్వారా ఫిర్యాదు చేసింది. తనను ప్రొఫెసర్లు దూషిస్తున్నారని.. మానసికంగా వేధిస్తున్నారని ఆరోపించింది. ఈ ఫిర్యాదుపై స్పందించిన గవర్నర్‌ విచారణకు ఆదేశించగా.. కమిటీ మెడికల్‌ కాలేజీలో విచారణ జరిపింది. ఈ నివేదిక జిల్లా కలెక్టర్‌కు అందజేయగా.. అక్కడి నుంచి గవర్నర్‌కు పంపించారు. అయితే పీజీ పరీక్షలు ఫలితాలురాగా.. శిల్ప అందులో ఫెయిల్‌ అయ్యింది. అందుకే మనస్తాపంతో ప్రాణాలు తీసుకుందనే అనుమానాలు వ్యక్తమవుతున్నాయి. తనను ప్రొఫెసర్లు వేధించినా వారిపై ఎలాంటి చర్యలు తీసుకోలేదని తనకు న్యాయం జరగలేదని ఆమె సన్నిహితుల దగ్గర ఆవేదనను వ్యక్తం చేసినట్లు తెలుస్తోంది. ఈలోపే విడుదలైన ఫలితాల్లో కూడా ఫెయిల్‌ కావడంతో శిల్ప ప్రాణాలు తీసుకొని ఉంటుందని బంధవులు, సన్నిహితులు అనుమానిస్తున్నారు. గతంలో కూడా ప్రాక్టికల్స్‌లో మార్కులు తగ్గిస్తామని ప్రొఫెసర్లు వేధించినట్లు ఆమె ఆరోపించిన విషయాన్ని గుర్తు చేస్తున్నారట. శిల్ప మృతితో తల్లిదండ్రులు, బంధువులు కన్నీరు మున్నీరవుతున్నారు.