గెలుపుపై అఖిలప్రియ స్పందన

నంద్యాల,ఆగస్ట్‌28 : భూమా కుటుంబం, టిడిపి ప్రభుత్వంపై ఉన్న నమ్మకంతోనే నంద్యాల ప్రజలు తమకు పట్టం కట్టారని మంత్రి భూమా అఖిలప్రియ అన్నారు. ఈ విఝయం ఊహించిందే అని, నంద్యాల ప్రజలు మరోమారు తమపై అభిమానం చాటారని అన్నారు. ఉప ఎన్నికల్లో బ్రహ్మానంద రెడ్డి విజయం తరవాత నంద్యాలలోని ఆమె నివాసంలో విూడియాతో మాట్లాడుతూ… టిడిపికి డిపాజిట్‌ కూడా రాదని వ్యాఖ్యలు చేసిన వారికి ఈ ఫలితం చెంపపెట్టు లాంటిదన్నారు. మాపై నమ్మకంతో ఓట్లేసిన ప్రజల నమ్మకాన్ని వమ్ము చేయకుండా నంద్యాలను అభివృద్ధి చేస్తాం. మంత్రిగా బాధ్యతలు పెరగడంతో రాయలసీమ అభివృద్ధికి కృషి చేసి నా తండ్రి ఆశయాలను నెరవేస్తా’ అని అన్నారు. నంద్యాల అభివృద్దికి మరింతగా కృషి చేస్తానని, నిధులు రాబడతానని అన్నారు. తన తండ్రి ఆశయాల కోసం పోరాడుతానని అన్నారు. ఇదిలావుంటే నంద్యాలలో మంత్రి అఖిలప్రియపై ఓ పోస్టర్‌ అందరినీ ఆకట్టుకుంటోంది. నంద్యాల ఉపఎన్నికల్లో ప్రతీ రౌండ్‌లోనూ టీడీపీ భారీ మెజార్టీని సొంతం చేసుకుంది. దీంతో నంద్యాలలో టీడీపీ శ్రేణులు మంత్రి అఖిల ప్రియ ఫోటోతో ఓ పోస్టర్‌ను పెట్టారు. ‘నంద్యాల జేజమ్మ…ఇక్కడ ఏ పశుపతి ఆటలు సాగవ్‌’ అంటూ నంద్యాలలో పోస్టర్లు వెలిశాయి. నంద్యాలలోని వాడవాడలో ఈ పోస్టర్లను అతికించారు. ఇప్పుడు ఈ పోస్టర్‌ సోషల్‌ విూడియాలో వైరల్‌ అయ్యింది. మరోవైపు నంద్యాల ఉపఎన్నికలో టీడీపీ భారీ మెజార్టీతో దూసుకెళ్లడంతో ఆ పార్టీ శ్రేణులు సంబరాలు చేసుకున్నారు. రోడ్లపైకి వచ్చి బాణాసంచా కాల్చారు. ఒకరికి ఒకరు స్వీట్లు పంచుకుంటూ తమ ఆనందాన్ని వ్యక్తం చేస్తున్నారు.