– ఛత్తీస్‌గఢ్‌లోని బిలాస్‌పూర్‌లో అరుదైన ఘటన

– శిశువును చూసేందుకు బారులు తీరిన ప్రజలు

రాయ్‌చోట్‌, నవంబర్‌24(జ‌నంసాక్షి) : మూడు చేతులతో ఉన్న శిశువుకు ఓ మహిళ జన్మనిచ్చిన అరుదైన ఘటన చత్తీస్‌గఢ్‌లోని బిలాస్‌పూర్‌లో జరిగింది. బిలాస్‌పూర్‌ జిల్లా తక్తాపూర్‌ సవిూపంలోని దౌజా గ్రామంలో మూడు చేతులతో జన్మించిన శిశువును చూసేందుకు జనం పెద్ద సంఖ్యలో తరలివచ్చారు. దౌజా గ్రామానికి చెందిన శివకుమార్‌ సాహు భార్య రాధిక సాహు నవంబరు 2న మూడు చేతులు చిన్నారికి జన్మనిచ్చింది. కుడిభుజానికి రెండు చేతులతో పుట్టిన ఈ చిన్నారి ప్రస్తుతం ఆరోగ్యంగా ఉన్నట్టు వైద్యులు తెలిపారు. చిన్నారి జననం గురించి ఆరోగ్య కేంద్రానికి కుటుంబసభ్యులు సమాచారం అందజేయడంతో స్థానిక వైద్యులు పాపను పరిశీలించారు. ఆమె ఆరోగ్యం సాధారణంగా ఉందని పరిశీలించిన డాక్టర్‌ సంతోష్‌ తెలిపారు. దీనిపై చత్తీస్‌గఢ్‌ ఇన్‌స్టిట్యూట్‌ ఆఫ్‌ మెడికల్‌ సైన్సెస్‌ ఇంఛార్జ్‌ డాక్టర్‌ బీపీ సింగ్‌ మాట్లాడుతూ… ఇలాంటి అరుదైన జననం పది లక్షల మందిలో ఒకటి ఉంటుందని తెలిపారు. కొంత మంది ఆరు వేళ్లతోనూ లేదా అదనపు అవయవాలతోనూ జన్మిస్తారని, వైద్య పరిభాషలో దీనిని అసాధారణ జన్యులోపంగా వ్యవహరిస్తారని తెలియజేశారు. అయితే, వీటిని శస్త్రచికిత్స ద్వారా తొలిగించవచ్చని అన్నారు. ఆపరేషన్‌ తర్వాత ఇలాంటి పిల్లలు సాధారణ జీవితం గడుపుతారని డాక్టర్‌ సింగ్‌ వివరించారు. ప్రస్తుతం చిన్నారి బిలాస్‌పూర్‌లోని చత్తీస్‌గఢ్‌ ఇన్‌స్టిట్యూట్‌ ఆఫ్‌ మెడికల్‌ సైన్సెస్‌ వైద్యుల పర్యవేక్షణలో ఉంచారు. కానీ, ఈ చిన్నారి కేసులో మాత్రం 12 నుంచి 15 ఏళ్ల మధ్యలోనే ఆపరేషన్‌ చేయాలని సూచించారు. ప్రస్తుతం శస్త్రచికిత్సకు పాప శరీరం సహకరించదని వెల్లడించారు.