లారీ దూసుకెళ్లి వ్యక్తి మృతి

యాదాద్రి భవనగిరి,జూలై17(జ‌నం సాక్షి): లారీ దూసుకుని వెళ్లడంతో ఓ వ్యక్తి అక్కడికక్కడే ప్రాణాలొదిలాడు. ఈ విషాద సంఘటన యాదాద్రి భవనగిరి జిల్లాలోని జమ్మపురం గ్రామ సవిూపంలోని పెట్రోల్‌ బంక్‌ వద్ద మంగళవారం చోటు చేసుకుంది. లారీ పక్కన కింద పడుకున్న వ్యక్తిని గమనించని మరో లారీ డ్రైవర్‌ అతడి పైనుంచి లారీని పొనిచ్చాడు. దాంతో సదరు వ్యక్తి అక్కడికక్కడే చనిపోయాడు. అది గమనించిన పెట్రోల్‌ బంక్‌ సిబ్బంది పోలీసులకు సమాచారం అందించారు. పెట్రోల్‌ బంక్‌ సిబ్బంది సమాచం మేరకు ప్రమాదస్థలికి చేరుకున్న పోలీసులు మృతదేహాన్ని స్వాధీనం చేసుకొని పోస్టుమార్టం నిమిత్తం ఆసుపత్రికి తరలించారు. అనంతరం కేసు నమోదు చేసుకుని దర్యాప్తు చేస్తున్నారు.

గొర్రెలపై దూసుకెళ్లిన లారీ

రోడ్డు పక్కన వెళ్తున్న గొర్రెలపై నుంచి లారీ దూసుకెళ్లడంతో 20 గొర్రెలు మృతి చెందాయి. ఈ ఘోర రోడ్డు ప్రమాద సంఘటన నాగర్‌కర్నూల్‌ జిల్లాలోని బిజినేపల్లి మండలం కొట్టాలగడ్డ గ్రామంలో మంగళవారం చోటు చేసుకుంది. వేగంగా వచ్చిన లారీ అదుపుతప్పి గొర్రెలపైకి దూసుకెళ్లింది. ఈ ప్రమాదంలో 20 గొర్రెలు అక్కడికక్కడే చనిపోగా, మరో 15 గొర్రెలు తీవ్రంగా గాయపడ్డాయి. ఈ ప్రమాదం వల్ల సుమారు రూ. 3 లక్షల వరకు నష్టం వాటిల్లినట్లు బాధితుడు చెప్పాడు. ఘటనపై కేసు నమోదు చేసుకున్న పోలీసులు లారీ డ్రైవర్‌ను అదుపులోకి తీసుకుని విచారిస్తున్నారు.