– ఇంటర్‌ నుంచే ఫ్రీ ల్యాప్‌టాప్‌లు
– 15అంశాలతో టీటీడీపీ మేనిఫెస్టో విడుదల
– రైతులకు, అమర వీరుల కుటుంబాలకు పెద్దపీట
– మేనిఫెస్టోను విడుదల చేసిన టీటీడీపీ అధ్యక్షుడు ఎల్‌. రమణ
– ప్రజల ఆకాంక్షలకు అనుగుణంగా మేనిఫెస్టోను రూపొందించామని వెల్లడి
హైదరాబాద్‌, నవంబర్‌21(జ‌నంసాక్షి) : తెలంగాణ ఎన్నికల్లో మహాకూటమిగా ఏర్పడిన కాంగ్రెస్‌, టీడీపీ, సీపీఐ, టీజేఎస్‌లు ఎన్నికల ప్రణాళికలను మాత్రం వేర్వేరుగా వెల్లడిస్తున్నాయి. తాజాగా, టీడీపీ తన ఎన్నికల మేనిఫేస్టోను బుధవారం ప్రకటించింది. హైదరాబాద్‌లోని ఎన్టీఆర్‌ ట్రస్ట్‌ భవన్‌లో తెలంగాణ టీడీపీ అధ్యక్షుడు ఎల్‌ రమణ దీనిని విడుదల చేశారు. ఈ సందర్భంగా రమణ మాట్లాడుతూ.. ప్రజాకూటమి అధికారంలోకి వస్తే ఏటా ఉద్యోగ క్యాలెండర్‌ను ప్రకటిస్తామని, రూ.2లక్షల వరకు రైతులకు రుణమాఫీ, దీనిని కౌలు రైతులకు వర్తింపు చేస్తామని తెలిపారు. అన్నా క్యాంటీన్ల ద్వారా రూ.5లకే భోజనం, ఇంటర్‌ నుంచే విద్యార్థులకు వర్శిటీ విద్యార్థులకు ఉచితంగా ల్యాప్‌టాప్‌లు పంపిణీ చేస్తామని పేర్కొన్నారు. విభజన బిల్లులో అంశాల అమలుకు కేంద్రంపై ఒత్తిడి తీసుకొస్తామని మేనిఫేస్టోలో వివరించారు. అమరవీరుల కుటుంబాల్లో ఇంటికో ఉద్యోగం, ఇల్లు, వారి సంక్షేమానికి ప్రాధాన్యతనిస్తామని స్పష్టం చేశారు. అన్ని జిల్లాల్లో పూలే, అంబేడ్కర్‌ నాలెడ్జ్‌ కేంద్రాలు, హైద్‌రాబాద్‌ ధర్నా చౌక్‌ పునరుద్దరణ, లోకాయుక్త ఏర్పాటు, లోకాయుక్త పరిధిలోకి ప్రజాప్రతినిధులు, నిరుద్యోగులకు నెలకు రూ.3 వేలు భృతి అందజేయనున్నట్టు తెలిపారు. బెల్ట్‌ షాపుల రద్దు, విద్యారంగానికి బడ్జెట్‌లో అదనంగా రూ.5వేల కోట్లు కేటాయింపు, అధికారంలోకి వచ్చిన తొలి ఏడాదే లక్ష ఉద్యోగాలు, ప్రొఫెసర్‌ జయశంకర్‌ పేరిటి విద్యా సంస్థలు, ప్రగతి భవన్‌ను ప్రజాస్పత్రిగా మారుస్తామని హావిూ ఇచ్చారు. పేద యువతుల వివాహానికి రూ.1.50 లక్షల ఆర్థికసాయం, ఎస్సీ వర్గీకరణ, ఎస్సీ, ఎస్టీ సబ్‌ఎ/-లాన్‌, బీసీలకు సబ్‌ప్లాన్‌, ప్రభుత్వ ఉద్యోగులకు పాత పెన్షన్‌ విధానం అమలు చేస్తామని తెలిపారు. 58 ఏళ్లు నిండిన అనాధలు, వితంతువులు, వృద్ధులకు నెలకు రూ.2వేల పింఛన్‌ ఇస్తామని, ఆర్థికంగా వెనుకబడిన అగ్రవర్ణాల సంక్షేమానికి చర్యలు, పక్కా ఇళ్ల నిర్మాణానికి రూ.5 లక్షల సాయం, ప్రతి ఇంటికీ మంచినీరు, వ్యవసాయానికి 24 గంటల ఉచిత విద్యుత్‌, దివ్యాంగులకు రూ.3వేలు పించన్‌ ఇస్తామని పేర్కొన్నారు. అనంతరం టీడీపీ నేత రావుల చంద్రశేఖర్‌రెడ్డి మాట్లాడుతూ.. దేశంలో తొలిసారి పెన్షన్లు ఇచ్చింది నాడు ఎన్టీఆరేనని అన్నారు. టీడీపీ అంటే సంక్షేమానికి మారుపేరని ఆయన వ్యాఖ్యానించారు. మిగులు బడ్జెట్‌ రాష్ట్రాన్ని ప్రస్తుతం కేసీఆర్‌ అప్పులపాలు చేశారని రావుల ఆరోపించారు. కేసీఆర్‌ హయాంలో తెలంగాణకు చేసిందే ఏవిూలేదని అన్నారు.. స్వర్గీయ ఎన్టీఆర్‌ ప్రవేశపెట్టిన సంక్షేమ పథకాలే తమ మేనిఫేస్టో రూపకల్పనకు స్ఫూర్తి అని టీడీపీ నేతలు తెలిపారు. గతం, వర్తమానం, భవిష్యత్తు అంశాలను పరిగణనలోకి తీసుకుని మేనిఫేస్టో రూపొందించామని వెల్లడించారు. ఈ కార్యక్రమంలో టీడీపీ మహిళా నాయకులు, ఇతర నేతలు పాల్గొన్నారు.
రైతులకు రూ. 2లక్షల రుణమాఫీ చేస్తాం
