విజయవాడ,మే14(జ‌నం సాక్షి): కృష్ణా జిల్లా విస్సన్నపేట మండలంలో సోమవారం ఘోర రోడ్డు ప్రమాదం జరిగింది. విస్సన్నపేట వైపు నుంచి నూజివీడు వైపు ప్రయాణికులతో వెళుతున్న ఆటో ఎదురుగా వస్తోన్న లారీని వేగంగా ఢీకొట్టింది. దీంతో ఆటోడ్రైవర్‌ సహా ముగ్గురు మృతి చెందారు. ఈ ప్రమాదంలో ఆటో నుజ్జునుజ్జయింది. మృతులు రెడ్డిగూడెం మండలం శ్రీరాంపురం గ్రామానికి చెందిన ఆటోడ్రైవర్‌ రాజారావు, లక్ష్మీకాంతం (45), మూడు నెలల పసికందుగా పోలీసులు గుర్తించారు. మృతుల్లో పసికందు ఉండటం అక్కడి వారిని తీవ్రంగా కలిచివేసింది. ఈ ప్రమాదంలో మరో ముగ్గురు తీవ్రంగా గాయపడగా.. క్షతగాత్రులను చికిత్స నిమిత్తం నూజివీడు ప్రభుత్వాసుపత్రికి తరలించారు.
—