12న ఆన్‌లైన బుకింగ్‌లకు అవకాశం

తిరుమల,జూలై10(జ‌నం సాక్షి ): అక్టోబరు 10 నుండి 18వ తేదీ వరకు జరుగనున్న శ్రీవారి నవరాత్రి బ్ర¬్మత్సవాలకు తిరుమలకు విశేషంగా విచ్చేసే భక్తులకు సేవలందించేందుకు శ్రీవారి సేవ స్లాట్‌ను జూలై 12వ తేదీన టిటిడి విడుదల చేయనుంది. టిటిడి ఈవో అనిల్‌కుమార్‌ సింఘాల్‌ ఆదేశాల మేరకు తిరుమల జెఈవో కె.ఎస్‌.శ్రీనివాసరాజు పర్యవేక్షణలో శ్రీవారి నవరాత్రి బ్ర¬్మత్సవాలకు గాను జూలై 12వ తేదీ ఉదయం 10 గంటలకు ఆన్‌లైన్‌లో స్లాట్‌ను అందుబాటులో ఉంచుతారు. ఆసక్తి గలవారు తమ ఆధార్‌ కార్డు ద్వారా నమోదు చేసుకోవచ్చు. అక్టోబరు 9 నుండి 15వ తేదీ వరకు, అక్టోబరు 10 నుండి 16వ తేదీ వరకు 7 రోజుల స్లాట్‌ అందుబాటులో ఉంటుంది. 18 నుండి 60 ఏళ్లలోపు వయసు ఉన్నవారు బుక్‌ చేసుకోవచ్చు. 4 రోజుల స్లాట్‌ అక్టోబరు 15 నుండి 18వ తేదీ వరకు ఉంటుంది. ఈ స్లాట్‌ బుక్‌ చేసుకున్నవారు అక్టోబరు 14న రిపోర్టు చేయాల్సి ఉంటుంది. 3 రోజుల స్లాట్‌ అక్టోబరు 12 నుండి 14వ తేదీ వరకు ఉంటుంది. ఈ స్లాట్‌

బుక్‌ చేసుకున్నవారు అక్టోబరు 11న రిపోర్టు చేయాల్సి ఉంటుంది. 4 రోజుల స్లాట్‌, 3 రోజుల స్లాట్‌ బుక్‌ చేసుకునేందుకు 25 నుండి 50 ఏళ్లలోపు వయసు ఉన్నవారు అర్హులు. శ్రీవారి సేవకులు తమకు నిర్దేశించిన తేదీల్లో మాత్రమే తిరుమలలోని సేవా సదన్‌లో రిపోర్టు చేయాల్సి ఉంటుంది. ఆ తరువాగానీ, ముందుగానీ వచ్చేవారు అనుమతించబడరు. సేవకులు రిపోర్టు చేసే సమయంలో ఆధార్‌ ఒరిజినల్‌ కార్డు, ఒక జెరాక్స్‌ కాపి, రెండు పాస్‌పోర్టు సైజ్‌ ఫొటోలు సమర్పించాల్సి ఉంటుంది.