జగన్‌ తీరుపై మండిపడ్డ సోమిరెడ్డి

విజయవాడ,జూలై14(జ‌నం సాక్షి): సులభతర వాణిజ్యంలో దేశంలోనే తొలి స్థానంలో ఆంధ్రప్రదేశ్‌ నిలిచిందని మంత్రి సోమిరెడ్డి చంద్రమోహన్‌ రెడ్డి అన్నారు. ఇదంతా సిఎం చంద్రబాబు చేస్తున్న కృషి అన్నారు. అయితే దీనిని కూడా జీర్ణించుకోలేని వారు ఉన్నారని మండిపడ్డారు. తెలుగువారై ఉండి ఏపీకి మొదటి స్థానం వస్తే కొందరు కడుపు మంటతో వ్యవహరిస్తున్నారని మండిపడ్డారు. ఏపీలో తయారైన మొదటి కారు దేశంలో తిరగబోతుందని చెప్పారు. దేశంలోకి 10 మొబైల్‌ఫోన్ల తయారీ కంపెనీలు వస్తే.. ఏపీకి రెండు వచ్చాయన్నారు. జగన్‌ కారణంగా పాదయాత్రకు ఉన్న పవిత్రత పోయిందని విమర్శించారు. ఆయన చేసేది పాదయాత్ర కాదని, క్యాట్‌వాక్‌ అని మంత్రి ఎద్దేవా చేశారు. పోలవరంలో అవినీతి జరిగిందని భాజపా, వైకాపా నేతలు విమర్శిస్తున్నారని మండిపడ్డారు. పోలవరం పనులు బాగా జరుగుతున్నాయని కేంద్ర జలవనరుల శాఖ మంత్రి నితిన్‌ గడ్కరీ ప్రశంసించారని గుర్తు చేశారు. పోలవరంపై విమర్శలు చేసేవారికి ఆయన మాటలే చెంపపెట్టు లాంటివని సోమిరెడ్డి అన్నారు. కేందరమంత్రి గడ్కరీ వాస్తవాలు చెప్పడం బిజెపి నేతలకు కూడా చెంపపెట్టన్నారు.