దేశానికి సేవ చేయాలన్న లక్ష్యంతో ఆర్మీలో చేరిన ఆ యువకుడి స్వప్నం చెదిరిపోయింది. దేశ సేవకు అంకితమైన తరుణంలోనే అనారోగ్యం రూపంలో మృత్యువు కబళించింది. అస్సాంలో తెలంగాణకు చెందిన ఆర్మీ జవాన్ మృతి చెందాడు. ఈ విషాదకర సంఘన ఆలస్యంగా వెలుగులోకి వచ్చింది. వివరాల్లోకి వెళ్తే..నల్లగొండ జిల్లా అనుముల మండలం మదారిగూడెంకు చెందిన ఈరటి మహేష్(24) ఏడాదిన్నరగా అస్సాంలోని దబీఘాట్‌ ప్రాంతంలో ఆర్మీ జవాన్‌గా విధులు నిర్వహిస్తున్నాడు.వాతావరణం సరిగ్గా లేకపోవడంతో అనారోగ్యానికి గురైన మహేష్‌ను అధికారులు స్థానికంగా ఉన్న సైనిక హాస్పిటల్‌కు తరలించారు. పరిస్థితి విషమించడంతో ఓ ప్రైవేట్‌ హాస్పిటల్‌లో చేర్పించారు. కాగా, చికిత్స పొందుతూ గురువారం రాత్రి మహేష్‌ మృతిచెందాడు. అస్సాం ప్రభుత్వం మృతదేహాన్ని స్వగ్రామానికి పంపే ఏర్పాట్లు చేస్తుంది. చిన్న వయసులో మహేష్ మృతి చెందడంతో మదారిగూడెంలో విషాదఛాయలు అలుముకున్నాయి.