ఓటుతో బుద్ధి చెప్పండి
– పోటీని చూసి భయపడకండి
– ఇష్టంతో ముందుకు సాగితే విజయం దరిచేరుతుంది
– ఇంపాక్ట్‌ -2018లో మాజీ ఐపీఎస్‌ అధికారి లక్ష్మీనారాయణ
రాజమహేంద్రవరం, జూన్‌23(జ‌నం సాక్షి) : అక్రమాలతో ఎన్నికల్లో గెలవాలనుకునే వారికి ఓటుతో బుద్ధి చెప్పాలని మాజీ ఐపీఎస్‌ అధికారి లక్ష్మీనారాయణ పిలుపునిచ్చారు. శనివారం రాజమహేంద్రవరంలో నిర్వహించిన ఇంపాక్ట్‌ -2018 కార్యక్రమంలో ఆయన ప్రసంగించారు. నాయకుల మాటల్ని గుడ్డిగా నమ్మకుండా లోతుపాతులను విశ్లేషించి నిర్ణయం తీసుకోవాలన్నారు. యువత పరిజ్ఞానం పెంపొందించుకుంటే ఎలాంటి పరిస్థితులనైనా ఎదుర్కొనే ధైర్యం పెంపొందుతుందని చెప్పారు. పోటీని చూసి భయపడకుండా ఇష్టంతో పనిచేస్తే విజయం చేరువవుతుందని గుర్తుచేశారు. డబ్బులు, మద్యం ఇచ్చి ఎన్నికల్లో గెలవగలం అని ఎవరైనా అనుకుంటే వారిపై ద్వేషం పెంచుకోవాలని తాను విద్యార్థులకు చెప్పినట్టు ఆయన విూడియాకు వెల్లడించారు. సమాజంలో విఘాతం కలిగించడానికి ఎవరైనా ప్రయత్నిస్తే వారిపై ద్వేషం పెంచుకోవాలని సూచించానని, అప్పుడే సమాజంలో మార్పు సాధ్యమవుతుందని ఆయన
అభిప్రాయపడ్డారు. రాష్ట్రంలోని 13 జిల్లాల యాత్ర పూర్తయ్యాక ఎలా ముందుకెళ్లాలనే విషయాన్ని ఆలోచించుకుంటానన్నారు. ఏ మార్గంలో వెళ్తే ప్రజా సమస్యలు పరిష్కారమవుతాయో తేల్చుకున్నాకే తన భవిష్యత్తు కార్యాచరణను విూడియాకు వెల్లడిస్తానని ఆయన చెప్పారు.