కాకినాడ,అక్టోబర్‌28(జ‌నంసాక్షి): తూర్పుగోదావరి జిల్లాలో ఘోర రోడ్డు ప్రమాదం జరిగింది. ఇందులో ఆరుగురు దుర్మరణం చెందారు. పలువురు గాయపడ్డారు. కొత్తపేట మండలం మూడేకర్రు మహాలక్ష్మీనగర్‌ వద్ద శనివారం తెల్లవారుజామున ఈ ఘోర రోడ్డు ప్రమాదం చోటుచేసుకుంది. లారీ, ఆటో ఢీకొన్న ఈ ఘటనలో ఆటోలో ప్రయాణిస్తున్న ఆరుగురు ప్రాణాలు కోల్పోయారు. మృతులంతా మహిళలే. అల్లవరానికి చెందిన సుమారు 13 మంది ఆత్రేయపల్లి మండలంలోని వాడపల్లి వెంకటేశ్వరస్వామి ఆలయానికి బయల్దేరారు. మార్గ మధ్యంలో ఓ లారీ వేగంగా వచ్చి వీరి ఆటోను ఢీకొట్టింది. ఈ దుర్ఘటనలో ఐదుగురు అక్కడిక్కడే ప్రాణాలు కోల్పోగా మరొకరు మార్గమధ్యంలో మృతి చెందారు. ప్రమాదంలో గాయపడిన మరో ముగ్గురిని అమలాపురంలోని కిమ్స్‌ ఆసుపత్రికి తరలించారు. మరోవైపు ఈ ప్రమాదం కారణంగా అమలాపురం-రావులపాలెం రహదారిపై వాహనాలు భారీగా నిలిచిపోయాయి. మృతులను చీకట్ల నాగమణి(46), పేరాబత్తుల అనంతలక్ష్మి(40), పి.భవాని(25), పులిమి అనంతలక్ష్మి(40), పి.పార్వతి(48), పి.దుర్గ(60)గా గుర్తించారు. రావులపాలెం సీఐ బి.పెద్దిరాజు కేసు నమోదు చేసుకొని దర్యాప్తు చేస్తున్నారు. ఈ ఘటనతో ఆప్రాంతంలో తీవ్ర విషాదంనెలకొంది.

అనంతలో కారు బీభత్సం

అనంతపురం పట్టణంలో శనివారం మధ్యాహ్నం ఓ కారు బీభత్సం సృష్టించింది. ఏపీ 04బీఎన్‌ 5248 అనే నెంబర్‌ గల కారు అదుపుతప్పి రహదారి పక్కన ఉన్న షాపులోకి దూసుకుపోయింది. ఈ సంఘటనలో ఇద్దరికి తీవ్ర గాయాలయ్యాయి. వారిని చికిత్స నిమిత్తం ఆసుపత్రికి తరలించారు. అయితే కారులో ఉన్నవారికి ఎటువంటి గాయాలు కాలేదు.