– ఎన్టీఆర్‌, గాలిని చంపింది చంద్రబాబే
– ఎన్టీఆర్‌ దయతోనే తాను రాజకీయాల్లోకి వచ్చా
– తిరుమల శ్రీవారిని దర్శించుకున్న మోత్కుపల్లి నర్సింహులు
– చంద్రబాబును ఓడించాలని స్వామిని కోరుకున్నానని వెల్లడి
తిరుపతి, జులై11(జ‌నం సాక్షి) : చంద్రబాబు నమ్మక ద్రోహి అని, ఎన్టీఆర్‌, గాలి ముద్దు క్రిష్ణమనాయుడును క్షోభకు గురిచేసి చనిపోయేందుకు కారణమైంది చంద్రబాబేనని తెలంగాణ మాజీ తెలుగుదేశం నేత మోత్కుపల్లి నరసింహులు ఘాటు విమర్శలు చేశారు. బుధవారం మోత్కుపల్లి పుట్టిన రోజు సందర్భంగా  తిరుమల శ్రీవారి దర్శనానికి వచ్చారు. అనంతరం మోత్కుపల్లి మాట్లాడుతూ.. దివంగత నేత ఎన్‌టీ రామారావు తనకు రాజకీయ భిక్ష పెట్టారని, ఆయన దయతోనే రాజకీయాల్లోకి వచ్చానని అన్నారు. చంద్రబాబు నాయుడు అధికారం కోసం ఎన్టీఆర్‌ను తీవ్ర మానసిక క్షోభకు గురిచేశారని ఆరోపించారు. చంద్రబాబు దుర్మార్గుడని తెలంగాణ ప్రజలు తరిమికొట్టే సమయంలో తాను అండగా ఉన్నానని చెప్పారు. తెలంగాణ ముఖ్యమంత్రి చంద్రశేఖర్‌ రావు తన స్నేహితుడని అయినా కూడా చంద్రబాబును వెనుకేసుకొచ్చినట్లు తెలిపారు. ఎన్టీఆర్‌ పుట్టిన రోజున తనను బర్తరఫ్‌ చేశారని ఆవేదన వ్యక్తం చేశారు. ఓటుకు కోటు కేసులో చంద్రబాబు మొదటి ముద్దాయి అని అన్నారు. ప్రతిపక్షంలో గెలిచిన వైఎస్సార్‌సీపీ ఎమ్మెల్యేలకు మంత్రి పదవులు ఇచ్చిన రాజకీయ అసమర్ధుడు బాబు అని మండిపడ్డారు. రోజు వందల కోట్లను దోచుకోవడం చంద్రబాబుకు ఇష్టమని, అందుకే సీఎం రమేష్‌, టీజీ వెంకటేష్‌లకు ఎంపీ పదవులను అమ్ముకున్నారని ఆరోపించారు. పదవులు ఇస్తానని మభ్యపెట్టడంలో చంద్రబాబు పీహెచ్‌డీ చేశారని, గాలి ముద్దుకృష్ణమ నాయుడును మానసిక క్షోభకు గురిచేసి చంపారని విమర్శించారు. ఏపీ ప్రజలు కష్టాలు పడుతుంటే, చంద్రబాబు ఆయన కొడుకు లోకేష్‌, కుటుంబం మాత్రమే సంతోషంగా ఉన్నారని దుయ్యబట్టారు. తనకు ఎదురు తిరిగిన వారిని బెదిరిస్తాడని లేకపోతే వారిని అంతమొందిచే వరకూ నిద్రపోడని విమర్శించారు. తనను కూడా పోలీసులు ద్వారా బెదిరించారని, అయినా తాను ఏమాత్రం భయపడనని చెప్పారు. వచ్చే ఎన్నికల్లో చంద్రబాబును ఓడించాలని స్వామిని కోరుకుంటానని మోత్కుపల్లి తెలిపారు.