విజయవాడ, జూన్‌21(జ‌నం సాక్షి) : విజయవాడ దుర్గగుడిలో శుక్రవారం సామూహిక అక్షరాభ్యాసాలు నిర్వహిస్తున్నట్లు ఈవో ఎం.పద్మ తెలిపారు. ఏటా విద్యా సంవత్సరము ప్రారంభంలో ఆలయంలో ఉచితంగా సామూహిక అక్షరాభ్యాసాలు నిర్వహించడం ఆనవాయితీగా వస్తోంది. అమ్మవారి జన్మ నక్షత్రమైన మూలా నక్షత్రం రోజున ఈ కార్యక్రమాన్ని ఏర్పాటు చేశారు. ఈ సందర్భంగా అమ్మవారిని సరస్వతి దేవి రూపంలో అలంకరించనున్నారు. ఉదయం 10గంటల నుంచి అక్షరాభ్యాస కార్యక్రమం ప్రారంభమవుతుంది. చిన్నారులకు అమ్మ సన్నిధిలో అక్షరాభ్యాసం చేయించాలనుకునే భక్తులు ఈ అవకాశాన్ని వినియోగించుకోవాలని ఈవో సూచించారు. కార్యక్రమానికి అవసరమైన సామాగ్రిని దేవస్థానం తరపున ఉచితంగా అందిస్తున్నారు. అక్షరాభ్యాసంలో పాల్గొనేవారు తమ పేర్లను ఆలయం ప్రాంగణంలో నేరుగా నమోదు చేసుకోవచ్చని వివరించారు.