నేడు హైదరాబాద్‌,సికింద్ర‌బాద్‌ అభివృద్ధిపై సీఎం కేసీఆర్ సమీక్ష

మే16 నుండి 20వ తేదీవ‌ర‌కు జంటనగరాల్లోని పలు ప్రాంతాల్లో స్వచ్ఛ్ హైదరాబాద్‌ జరిగింది. ఇందులో భాగంగా ఆయా ప్రాంతాలకు వెళ్లిన సీఎం కేసీఆర్‌ పలు సమస్యలను గుర్తించారు. ఈ సమస్యలకు పరిష్కారం సాధించే దిశగా తగు విధానాలు రూపొందించేందుకే కేసీఆర్‌ ఈ సమావేశాన్ని ఏర్పాటు చేశారు. జంట నగరాల్లో శానిటేషన్‌ వ్యవస్ధను మెరుగుపరచటమే ప్రధాన లక్ష్యంగా టీఎస్‌ సర్కార్‌ పెట్టుకున్నట్లు తెలుస్తోంది. దీంతో పాటు ప్రజల నుంచి ఇబ్బడి ముబ్బడిగా వచ్చిన అభ్యర్ధనలను కూడా పరిగణనలోకి తీసుకోనున్నారు.

ఇంతే కాకుండా ఈ సమావేశంలో ఆక్రమణలో ఉన్న ప్రభుత్వ భూములు, నాలాల విస్తరణ, రహదారుల విస్తరణకు ఉన్న అడ్డంకులు, మురికివాడల అభివృద్ధి, డబుల్ బెడ్‌ రూం ఇళ్ల నిర్మాణంతో పాటు హైదరాబాద్‌ను విశ్వనగరంగా తయారు చేసేందుకు తీసుకోవాల్సిన చర్యలపై కేసీఆర్‌ ప్రజాప్రతినిధులతో చర్చిస్తారు. అంతేకాక వారి నుంచి సలహాలు, సూచనలు కూడా స్వీకరిస్తారు. జిహెచ్ ఎంసి ఆధ్వర్యంలో జరగనున్న ఈ సమావేశానికి టీఎస్‌ చీఫ్‌ సెక్రటరీతో పాటుగా జిహెచ్ ఎంసి, జలమండలి, విద్యుత్, రెవెన్యూ, పోలీసు శాఖకు చెందిన పలువురు ఉన్నతాధికారులు హాజరవుతారు.