30 నిమిషాల పాటు తాజా రాజకీయాలపై చర్చ
రాజకీయంగా చర్చనీయాంశంగా మారిన ఇరువురి భేటీ
నాదెండ్ల జనసేనలోకి వెళ్తారని ప్రచారం
అమరావతి, జూన్‌23(జ‌నం సాక్షి) : కాంగ్రెస్‌ పార్టీ నేత, ఉమ్మడి ఆంధప్రదేశ్‌ అసెంబ్లీ స్పీకర్‌గా పని చేసిన నాదెండ్ల మనోహర్‌ జనసేన అధినేత పవన్‌ కల్యాణ్‌తో భేటీ అయ్యారు. శనివారం ఉదయం వీరిద్దరూ అర గంటకుపైగా సమావేశం అయ్యారు. ఏపీ విభజన తర్వాత రాజకీయాలకు దూరంగా ఉంటున్న మనోహర్‌ పవన్‌తో భేటీ కావడం ఏపీ రాజకీయ వర్గాల్లో చర్చనీయాంశమైంది. ఇటీవలే ఇతర నేతలతో కలిసి పార్టీని ఎలా ముందుకు తీసుకెళ్లాలనే విషయమై రాహుల్‌ గాంధీతో చర్చించిన నాదెండ్ల మనోహర్‌ కొద్ది రోజుల్లోనే జనసేనానిని కలవడం విశేషం. నాగార్జున యూనివర్శిటీ దగ్గర శుక్రవారం నిర్వహించిన శ్రీ భూసమేత దశావతార వెంకటేశ్వరస్వామి విగ్ర ప్రతిష్టాపన కార్యక్రమం సందర్భంగా.. జనసేనానిని నాదెండ్ల మనోహర్‌ కలిశారు. తర్వాత పవన్‌తో ప్రత్యేకంగా సమావేశమైన నేపథ్యంలో.. మనోహర్‌ జనసేనలో చేరతారా? అనే ఊహాగానాలు బయల్దేరాయి. ముందస్తు ఎన్నికలు ఖాయమన్న వార్తలు వెలువడుతున్న తరుణంలో నాదెండ్ల
కూడా తన రాజకీయ భవిష్యత్తు జనసేనలో చేరతారా? అనే ప్రశ్నలు ఉత్పన్నం అవుతున్నాయి. నాదెండ్ల వైసీపీలో చేరతారని ఏడాది క్రితం జోరుగా ప్రచారం జరిగింది. తెనాలిలో గట్టి పట్టున్న మనోహర్‌ చేరిక పట్ల జగన్‌ కూడా సముఖంగా ఉన్నారని వార్తలు వెలువడ్డాయి. కానీ ఆయన మాత్రం కాంగ్రెస్‌ పార్టీని వీడలేదు.ఏపీ అసెంబ్లీ డిప్యూటీ స్పీకర్‌గా పని చేసిన నాదెండ్ల మనోహర్‌ 2011లో కిరణ్‌ కుమార్‌ రెడ్డి స్థానంలో స్పీకర్‌గా బాధ్యతలు చేపట్టారు. 2004, 2009 సార్వత్రిక ఎన్నికల్లో గుంటూరు జిల్లా తెనాలి నియోజకవర్గం కాంగ్రెస్‌ పార్టీ తరఫున ఎమ్మెల్యేగా ఎన్నికయ్యారు.