ప్రారంభమైన ఇంటర్ పరీక్షలు..

హైదరాబాద్ : తెలుగు రాష్ట్రాల్లో ఇంటర్మీడియట్ పరీక్షలు బుధవారం నుంచి ప్రారంభమయ్యాయి. పరీక్షల నిర్వహణకు అవసరమైన అన్ని ఏర్పాట్లు పూర్తిచేసినట్లు తెలంగాణ ఇంటర్ బోర్డు ప్రకటించింది. తెలంగాణలో మొత్తం 9,64,664 మంది విద్యార్థులు ఈ పరీక్షలకు హాజరవుతున్నారు. ప్రతి రోజూ ఉదయం 9 గంటల నుంచి మధ్యాహ్నం 12 గంటల వరకు పరీక్షలు జరుగుతాయి. 1257 పరీక్షా కేంద్రాలు ఏర్పాటు చేశారు. 4,56,655 మంది మొదటి సంవత్సరం విద్యార్థులు, 5,08,008 మంది రెండో సంవత్సరం విద్యార్థులు పరీక్షలకు హాజరవుతున్నారు. ఆంధ్రప్రదేశ్ రాష్ట్రంలో 9,93,891 మంది విద్యార్ధులు ఈ పరీక్షలు రాయనున్నారు. మొదటి సంవత్సరానికి 5,00,419 మంది, రెండవ సంవత్సరానికి 4,93,472 మంది విద్యార్ధులు పరీక్షలు రాస్తున్నారు. రాష్ట్ర వ్యాప్తంగా 1363 సెంటర్లు ఏర్పాటు చేశారు. సమస్యాత్మకమైన 117 సెంటర్లలను ఇంటర్‌బోర్డు గుర్తించింది. అత్యంత సమస్యాత్మకమైన 35 సెంటర్లలో సీసీటీవీలను ఏర్పాటు చేశారు. విశాఖపట్టణంలో జిల్లా వ్యాప్తంగా పటిష్ట ఏర్పాట్లు చేశారు. జిల్లా వ్యాప్తంగా 120 సెంటర్లు ఏర్పాటు చేశారు. 56 సిటీ పరిధిలో ఉండగా 41 రూరల్, 13 ఏజెన్సీ పరిధిలో సెంటర్లు ఏర్పాటు చేశారు. 16 అతి సమస్యాత్మకమైన సెంటర్లుగా గుర్తించి సీసీ కెమెరాలు ఏర్పాటు చేశారు.