విశాఖపట్నం(జ‌నం సాక్షి ): కోటవురట్ల మండలం బాపిరాజుకొత్తపల్లి గ్రామంలో బాలికపై ఓ బాలుడు లైంగిక దాడికి పాల్పడ్డాడు. అతన్ని పోలీసులు అరెస్టు చేసి శనివారం జువనైల్‌ హోంకు తరలించారు. బాపిరాజుకొత్తపల్లి గ్రామ శివారులో ఉన్న పాకలో ఈ నెల 10న బాలిక (13)ను ఆదే ప్రాంతానికి చెందిన ఓ బాలుడు (15) లైంగికంగా వేధించడమే కాకుండా హత్య చేయడానికి కూడా ప్రయత్నించాడని నర్సీపట్నం రూరల్‌ సీఐ ఎల్‌.రేవతమ్మ తెలిపారు. బాలుడు ఎక్కువగా సెల్‌ఫోన్‌, వాట్సప్‌లో వస్తున్న నేర సంఘటనలను, నీలి చిత్రాలను చూస్తూ ఉంటాడని చెప్పారు.

 ఈ ఉద్రేకంతో సదరు బాలికపై లైంగిక దాడికి పాల్పడ్డాడని, ఆమె చనిపోయిందని భావించి తల్లిదండ్రులకు గాయపడినట్టు నమ్మించడానికి ప్రయత్నించాడని సీఐ తెలిపారు. బాలిక తల్లిదండ్రుల ఫిర్యాదు మేరకు కోటవురట్ల పోలీసులు ఈ నెల 14న బాలుడిపై హత్యాయత్నం కింద కేసు నమోదు చేశారన్నారు. అన్ని కోణాల్లో విచారణ చేపట్టగా బాలికను లైంగికంగా వేధించినట్టు కూడా నిర్ధారణ జరిగిందన్నారు. దీంతో శనివారం బాలుడు బీకే పల్లి వీఆర్వో ఎదుట లొంగిపోగా, అతన్ని అరెస్టు చేసి న్యాయస్థానంలో హాజరు పరచామన్నారు. న్యాయమూర్తి ఆదేశాల మేరకు విశాఖ జువనైల్‌ హోంకు తరలించినట్టు సీఐ తెలిపారు.