గుంటూరు,అక్టోబర్‌26(జ‌నంసాక్షి): రూరల్‌ మండలం అంకిరెడ్డిపాలెం వద్ద జాతీయ రహదారిపై జరిగిన రోడ్డు ప్రమాదంలో ఇంటర్‌ విద్యార్థి పెంచికల శివ (18) అక్కడికక్కడే మృతి చెందాడు. నల్లపాడు రోడ్డులోని నల్లకుంట 1వ లైనులో నివసించే చినరాయుడు మూడో కుమారుడైన శివ సంగడిగుంటలోని మాతృశ్రీ విద్యాసంస్థలో ఇంటర్‌ ద్వితీయ సంవత్సరం చదువుతున్నాడు. అతను బైకుపై వెళ్తుండగా వెనుక నుంచి వస్తున్న ఆర్‌వీఆర్‌ అండ్‌ జేసీ ఇంజనీరింగ్‌ కళాశాల బస్సు ఢీ కొట్టింది. తలకు తీవ్ర గాయమై శివ అక్కడికక్కడే మృతి చెందాడు. నల్లపాడు పోలీసులు కేసు నమోదు చేసి దర్యాప్తు చేస్తున్నారు.