కాపాడిన మరో బోటులోని జాలర్లు

కాకినాడ,ఆగస్ట్‌29(జ‌నం సాక్షి): సఖినేటిపల్లి అంతర్వేది సముద్రంలో చేపల వేటకు వెళ్లి మునిగిన బోటులోని మత్స్యకారులను మరో బోటులోని మత్స్యకారులు కాపాడిన విషయం బుధవారం వెలుగు చూసింది. సఖినేటిపల్లి అంతర్వేది సముద్రంలో చేపల వేటకు వెళ్లిన మత్స్యకారుల బోటు మంగళవారం మధ్యాహ్నం సముద్రంలో మునిగింది. అదే సమయంలో మరో బోటులో ఉన్న మత్స్యకారులు గమనించి వెంటనే ప్రమాదంలో చిక్కుకున్న విశాఖపట్నం జిల్లా నక్కపల్లి మండలం పెదతీనార్లు గ్రామానికి చెందిన ఆరుగురు మత్స్యకారులను సురక్షితంగా కాపాడారు. చింతకాయల రాజు, మెరిగ సత్తిబాబు, చెల్లూరి తాతీలు , వంక నాగరాజు , గరికిన జగదీష్‌ , మల్లిపల్లి జోగిరాజు లను వేరే బోటు సహాయంతో కాపాడారు. అందరూ సురక్షితంగా ప్రమాదం నుంచి బయటపడడంతో తీర ప్రాంత మత్స్యకారులు, ప్రమాదంలో చిక్కుకున్న వారి కుటుంబ సభ్యులు ఊపిరి పిల్చుకున్నారు.