తిరుపతి,అక్టోబర్‌30 (జనంసాక్షి) : మానసిక వృద్దాప్యం అంటే.. ’నాకు ముసలితనం వచ్చేసింది ’ అనే భావన… వయసుతో నిమిత్తం లేకుండా పనిలేకుండా శరీరాన్ని మనసును మూలన కూర్చోబెట్టటమే వృద్దాప్యం… వృద్దాప్యం అనేది, అనుకునేది ఒక మానసిక భావన…80 ఏళ్ల యువకులు ఉంటారు…40 ఏళ్ల వృద్ధులు ఉంటారు…భారతీయ సంప్రదాయం లో జ్ఞానవార్దక్యాన్ని అంగీకరించారుగానీ వయో వార్ధక్యాన్ని , మానసిక వృద్దాప్యాన్ని అంగీకరించలేదు… నిత్యవ్యాయామం, యోగాభ్యాసం, సద్గంª`రథ పఠనం, సతతక్రియాశీలత, మితాహారం, హితాహారం, ఇష్టదేవతా ఉపాసనం, ఇవి ఉన్న చోట ముసలితనం ఉండదని మన భారతీయ సంప్రదాయం చెబుతోంది… ముసలితనం రెండు రకాలుగా వస్తుంది.
వయోభారంతో వచ్చేది శారీరకం. దుఃఖం వల్ల వచ్చేది భావజం. వయోభారం వల్ల వచ్చేది కూడా ఆపాదింపబడిన ముసలితనమే. కొంతమంది యాభయ్యవ పడిలోకి రాగానే వృద్ధులయ్యారంటారు. కొందరు అరవై సంవత్సరాలకు ముసలివారనిపించుకుంటారు. 70 ఏళ్లు వచ్చినా చురుగ్గానే ఉండేవారు మరికొందరు. శరీర బలం తగ్గి, అవయవాలు పటుత్వం కోల్పోయి, నరాల కండరాల పట్టు సడలినా.. బుద్ధిబలంతో నిత్యం విజయాలను సాధించేవారు ఉన్నారు. కొందరికి సోమరితనం వల్ల వృద్దాప్యం వస్తుంది….పని చేయడానికి బద్ధకించి పని సామర్థ్యాన్ని కోల్పోతే దాన్ని మించిన వార్ధక్యం మరొకటి లేదు. అటువంటివారు సమాజ ప్రగతికే కాక సొంత ప్రగతికి కూడా శత్రువులే. అతి పిసినారితనం, స్వార్థం, మద్యపానం, ధూమపానం,
మత్తుమందుల వాడకం వంటి దురలవాట్లు శరీరంలో అనేక సామర్థ్యాలను బలహీనపరుస్తాయి. అకాల వార్ధక్యానికి దారి తీస్తాయి. ఆయుర్దాయాన్ని తగ్గిస్తాయి. అటువంటి వృద్ధులు తమ కుటుంబాలకు సమాజానికి కూడా భారమే. మానసిక ఒత్తిడులు, కుంగుబాటు వల్ల వచ్చే ముసలితనం చెదపురుగులాంటిది. మనిషి భవితను సమూలంగా తినేస్తుంది…..అందుకే ముసలితనం వయసులో లేదు. మనసులోనూ ఉండకూడదు. ఎప్పుడూ పని చేసుకునేవానికి ముసలితనపు పీడ ఉండదని ఆరోగ్య నిపుణులు అంటారు.