అధికారుల తీరుపై ఆర్చరీ జ్యోతి నిరసన
ఇంట్లోనే నిరాహారదీక్ష
విజయవాడ,మే7(జ‌నం సాక్షి): అర్జున అవార్డు గ్రహీత, ఆర్చర్‌ జ్యోతి సురేఖ విజయవాడలోని తన నివాసంలో నిరాహార దీక్షకు దిగారు. నజరానా కోత విషయంలో తనకు న్యాయం చేయాలని ప్రభుత్వాన్ని డిమాండ్‌ చేస్తూ ఆమె దీక్ష చేపట్టారు. అర్జున అవార్డు సాధించినందుకు ఏపీ సర్కారు జ్యోతికి కోటి రూపాయల నజరానా ప్రకటించింది. సీఎం ప్రకటించినా.. అధికారులు మాత్రం తనకు ప్రోత్సాహకం అందకుండా అడ్డుకుంటున్నారని ఆమె వాపోయింది. తనకు ప్రకటించిన మొత్తంలో రూ.22 లక్షలు కోత విధించారని తెలిపింది. ఇప్పటి వరకూ తనకు కేటాయించిన మొత్తం అందలేదన్నారు.
సీఎం ప్రకటించిన ప్రోత్సాహకంలో రూ.15 లక్షలను కోచ్‌ చెరుకూరి సత్యనారాయణకు కేటాయిస్తూ స్పోర్ట్స్‌ అథారిటీ ఆఫ్‌ ఆంధప్రదేశ్‌ (శాప్‌) అధికారులు నిర్ణయం తీసుకున్నారని జ్యోతి తెలిపింది. కాగా చెరుకూరి సత్యనారాయణ అసలు తన కోచ్‌ కాదంటూ జ్యోతి సురేఖ చెబుతున్నారు. సీఎం ప్రోత్సహిస్తున్నా.. అధికారులు మాత్రం ఆడటనివ్వడం లేదని ఆమె తండ్రి వాపోయారు.  ఈ విషయమై ఎమ్మెల్సీ డొక్కా మాణిక్య వరప్రసాద్‌ స్పందిస్తూ.. జ్యోతి సురేఖకు న్యాయం చేసేలా చూస్తామన్నారు. అధికారుల సమన్వయ లోపం కారణంగానే ఈ సమస్య తలెత్తిందన్న ఆయన ఈ వివాదం విషయమై మంత్రి కొల్లు రవీంద్ర, శాప్‌ అధ్యక్షుడితో మాట్లాడానన్నారు. ఎమ్మెల్సీ హావిూ ఇవ్వడంతో.. ప్రభుత్వం ఎలాంటి చర్యలు తీసుకుంటుందో మరి కాసేపు వేచి చూస్తానని, తర్వాత తన దీక్ష విషయమై నిర్ణయం ప్రకటిస్తానని జ్యోతి సురేఖ చెప్పారు. ఆంధ్రప్రదేశ్‌లో ఉన్నప్పుడు ఓల్గా ఆర్చరీ అకాడవిూలో జయ రామారావు తనకు కోచ్‌గా వ్యవహరించారని చెప్పారు. ఆ తర్వాత 2013 నుంచి జాతీయ అకాడవిూలో శిక్షణ పొందుతున్నానని, అక్కడ జీవన్‌ జ్యోత్‌ సింగ్‌ తనకు కోచ్‌గా వ్యవహరించారన్నారు. 2012లో శాప్‌ ఆధ్వర్యంలోనే తాను అమెరికా వెళ్లి శిక్షణ పొందానని చెప్పారు. ఇప్పుడు ఎలాంటి సంబంధం లేని చెరుకూరి సత్యనారాయణకు తనకు కేటాయించిన మొత్తంలో రూ.15 లక్షలు కోత విధించి ఇవ్వడం దారుణమన్నారు.