కాచాపూర్‌లో ఎగిసిపడ్డ కన్నీటి కెరటం
భూమయ్య సార్‌కు ఘనంగా వీడ్కోలు
కరీంనగర్‌/జూలపల్లి, డిసెంబర్‌ 26 (జనంసాక్షి) :
పోరాటాల పురిటిగడ్డ కాచాపూర్‌ కన్నీటి కెరటమై ఎగసి పడింది. దారులన్నీ కాచాపూర్‌ వైపే సాగాయి. తెలంగాణ ఉద్యమ దిక్సూచీ ఆకుల భూమయ్య అనుభూతులతో అక్కడ ప్రతి హృదయం బరువెక్కింది. ప్రత్యేక రాష్ట్ర సాధనే ధ్యేయంగా చివరి శ్వాస వరకూ పోరాడిన భూమయ్య సార్‌కు కడసారి నివాళులర్పించేందుకు పది జిల్లాల నుంచి ఉద్యమ కారులు తరలివచ్చారు. ఆయన విప్లవవీరుడని గుర్తు చేస్తూ మృతదేహంపై ఎర్రగుడ్డ కప్పి నివాళులర్పించారు. భూమయ్య సార్‌ అమర్‌ రహే అంటూ నినాదాలు చేశారు. ఈనెల 24న రాత్రి హైదరాబాద్‌లోని విద్యానగర్‌ వద్ద స్కూటర్‌ను టిప్పర్‌ ఢీకొన్న ప్రమాదంలో అనుమానాస్పద స్థితిలో మరణించిన తెలంగాణ ప్రజాఫంట్‌ అధ్యక్షుడు ఆకుల భూమయ్యకు గురువారం ఆయన స్వగ్రామం జూలపల్లి మండలంలోని కాచాపూర్‌లో అంత్యక్రియలు నిర్వహించారు. తెలంగాణ ప్రజాసంఘాల నాయకులు, వివిధ పార్టీల నాయకులు, పెద్ద సంఖ్యలో ప్రజలు తరలివచ్చి నివాళులర్పించారు. విప్లవకవి వరవరరావు, తెలంగాణ రచయితల వేదిక అధ్యక్షుడు నందిని సిధారెడ్డి, టీఎన్‌జీవోస్‌ రాష్ట్ర అధ్యక్షుడు దేవిప్రసాద్‌, టీపీఎఫ్‌ ఉపాధ్యక్షుడు వేదకుమార్‌, ఏపీసీఎల్సీ నేత రఘునాథ్‌ తదితరులు ఘన నివాళులర్పించారు. తెలంగాణ డెమెక్రసీ తెలంగాణ అసంఘిటిత కార్మిక సంఘ సమైక్య, జేఏసీ, టీఆర్‌ఎస్‌, బిజేపి పలు రకాల పార్టీల నాయకులతో వేలాదిమంది ప్రజలు ఘనంగా వీడ్కోలు పలికారు. కళాకారుల ఉద్యమ పాటలతో ఉరెేగింపుగా ఆయన శవయాత్ర మొదలైంది. భూమన్న 1950లో కాచాపూర్‌లో జన్మించారు. సొంత గ్రామంలో ప్రాథమిక విద్య అభ్యసించి పెద్దపల్లి జమ్మికుంట కరీంనగర్‌లో ఉన్నత విద్యనుభ్యసించారు. విద్యార్థి దశలనే చురుకైన పాత్రలో పాల్గోని ఉపాధ్యాయ వృత్తిని చేపట్ట్టి ఉపాధ్యాయ సంఘాల నాయకునిగా కరీంనగర్‌, ఆదిలాబాద్‌ జిల్లాల ప్రజాఫంట్‌ రాష్ట్ర అధ్యక్షుడిగా పనిచేశారు. ప్రత్యేక తెలంగాణ రాష్ట్ర ఉద్యమంలో చురుకుగాపలు సంఘాల నాయకులను కలసి గ్రామగ్రామాన విప్లవ ఉద్యమాలు కొనసాగిస్తూ 1996లో కార్యచరణ సభ్యులుగా ఎదిగి తెలంగాణ ఉద్యమాన్ని నడిపించారు. 43సంవత్సరంలో సుదీర్ఘ ప్రస్థానంలో ఉద్యమాన్ని ముందుకు తీసికెళ్లిన ఆకుల భూమయ్యకు విప్లవ సంప్రదాయ ప్రకారం అంతిమ యాత్ర నిర్వహించారు. అంతిమయాత్రలో కోట శ్రీనివాస్‌గౌడ్‌ కంచెర్ల బద్రిత ఫనాంక్‌, చాడ వెంకటరెడ్డి, మీస అర్జున్‌రావు, కన్నం అంజయ్య బిరుదు రాజమల్లు, దాసరి మనోహర్‌రెడ్డి, రఘువీర్‌సింగ్‌, రియాజ్‌అహ్మద్‌, శంకర్‌ముదిరాజ్‌, గోమాస శ్రీనివాస్‌, ప్రసాద్‌ పాల్గొన్నారు.
