ముంబై, ఫిబ్రవరి 1 (జనంసాక్షి) :
దేశంలోని మొట్టమొదటి మోనో రైలు సేవలు ఆర్థిక రాజధాని ముంబైలో ప్రారంభమయ్యాయి. శనివారం మోనో రైలు సేవలను ఆ రాష్ట్ర ముఖ్యమంత్రి పృథ్వీరాజ్‌చవాన్‌ ప్రారంభించారు. వడాల-చెంబూర్‌ మధ్య 8.9 కిలోమీటర్ల మేర మోనో రైలు సర్వీసులు నడుపనున్నట్లు చవాన్‌ తెలిపారు. ఉదయం ఏడు గంటల నుంచి రాత్రి వరకూ ఈ రైళ్లు ప్రయాణికులకు అందుబాటులో ఉంటాయని ఆయన పేర్కొన్నారు. మలిదశలో జాకబ్‌ సర్కిల్‌ వరకు ఈ రైలు మార్గాన్ని పొడిగిస్తారు. దీంతో ముంబై నగరంలో మొత్తం 20కిలోమీటర్ల మేర మోనో రైలు సేవలు అందుబాటులోకి వస్తాయి. నాలుగు కంపార్ట్‌మెంట్లు ఉండే మోనో రైలులో 560 మంది ప్రయాణం చేయవచ్చు. కార్యక్రమంలో ఉప ముఖ్యమంత్రి అజిత్‌ పవార్‌ తదితరులు పాల్గొన్నారు.
