చౌతాలా చలో జైలుకు
కోర్టు ఆదేశం
న్యూఢిల్లీ, అక్టోబర్‌ 11 (జనంసాక్షి) : ఆరోగ్యం బాగోలేదని బెయిల్‌ తీసుకుని ఎన్నికల ప్రచారం చేస్తావా? అని హర్యానా మాజీ ఓం ప్రకాష్‌ చౌతాలాను కోర్టు ప్రశ్నించింది. ఆదివారం మళ్ళీ జైల్లో కూర్చోవాలని ఆదేశించింది. మహా దూకుడు ప్రదర్శిస్తున్న చౌతాలా (79)కి ఢిల్లీ హైకోర్టు గట్టి వార్నింగ్‌ ఇచ్చింది. చౌతాలా బెయిల్‌ను రద్దుచేసిన కోర్టు.. ఇక ఎన్నికల ప్రచారంలో కూడా ఎక్కడా పాల్గొనకూడదని ఆదేశించింది. ఇటీవల అనారోగ్యం పేరుతో బెయిల్‌పై వచ్చిన చౌతాలా ఎన్నికల ప్రచారంలో పాల్గొనడంతో సిబిఐ అభ్యంతరం తెలిపింది. దీంతో అతడి బెయిల్‌ రద్దు చేయాలని కోర్టును ఆశ్రయించింది. నాలుగుసార్లు ముఖ్యమంత్రిగా పనిచేసిన చౌతాలా.. విద్యాశాఖలో ఉపాధ్యాయ నియామకాల్లో అవినీతికి పాల్పడినట్లు రుజువు కావడంతో ఆయనకు పదేళ్ల జైలుశిక్ష పడింది. ముఖ్యమంత్రిగా పనిచేసిన కాలంలో ఆయన ఆదాయానికి మించిన ఆస్తులు కూడగట్టుకున్నట్లు కూడా కేసు నమోదై, దానివిూద కూడా విచారణ జరిగింది. అయితే, 2013 మే నేలలో తనకు ఆరోగ్యం బాగోలేదని, గుండె సమస్య ఉందని చెప్పి తీహార్‌ జైలు నుంచి బెయిల్‌ విూద బయట పడ్డారు. ఇప్పుడు మళ్లీ ఒకవేళ చౌతాలాకు ఆరోగ్యం బాగోలేదని, ఆయన ఇబ్బంది పడుతున్నారని జైలు అధికారులు భావిస్తే ప్రభుత్వరంగంలోని ఎయిమ్స్‌కు మాత్రమే పంపాలని కోర్టు చెప్పింది.అయితే, బెయిల్‌ నిబంధనలలో తాను ప్రజలను కలవకూడదన్న విషయం ఎక్కడా లేదని, అలాంటప్పుడు తనను ఎన్నికల ప్రచారం చేయనివ్వకపోవడం సమంజసం కాదని చౌతాలా విలేకరులతో అన్నారు. ఇక ఈసారి ఎన్నికల్లో మళ్లీ తమ పార్టీ విజయం సాధించడం ఖాయమని, ఆయన జైలు నుంచే ప్రభుత్వాన్ని నడిపిస్తారని చౌతాలా కుమారుడు అభయ్‌ (51) అంటున్నారు. కానీ, సుప్రీంకోర్టులో కేసు గెలిస్తే తప్ప ఇది సాధ్యం కాదు. ఎందుకంటే.. రెండేళ్లకు మించి శిక్ష పడినవాళ్లు ఎలాంటి పదవులు అనుభవించడానికి గానీ, ఎన్నికల్లో పోటీ చేయడానికి గానీ వీల్లేదు.
